ᐅᖃᐅᓰᑦ ᐱᓇᓱᒍᓐᓇᐅᑎᖏᑦ ᑐᑭᑖᕐᑐᐃᔨᒃᑯᑦ

ᐃᒻᒥᒍᑦ ᐊᐅᓚᓂᕐᒧᑦ ᒪᓕᒐᖏᑦ ᑐᑭᑖᕐᑐᐃᔨᒃᑯᓂ ᐅᖃᕐᓯᒪᕗᑦ ᑲᑎᒪᔩᑦ ᖃᓄᐃᓘᖃᑎᒌᓐᓂᖏᑦ ᐊᑑᑎᒍᓐᓇᑎᓪᓗᒋᑦ ᐅᐃᒍᐃᑎᑐᑦ, ᖃᓪᓗᓈᕐᑎᑐᑦ, ᐃᓄᒃᑎᑐᑦ ᐅᕝᕙᓘᓐᓃᑦ, ᓈᒻᒪᓈᓕᕐᐸᑦ. ᓇᔅᑳᐱᑎᑐᑦ. ᑐᑭᑖᕐᑐᐃᔩᑦ ᐱᓇᓱᒍᓐᓇᐅᑎᖏᓐᓄᑦ ᐅᖃᐅᓯᕐᓄᑦ ᒪᓕᒐᖅ ᑲᑎᒪᔨᓕᒫᓂᒃ ᐱᒋᐊᖃᕐᑎᓯᕗᖅ ᓈᒻᒪᑐᒥᒃ ᐅᖃᐅᓯᕐᒥᒍᑦ ᑕᑯᒍᓐᓇᓂᕐᒥᒃ ᐊᓪᓚᓕᒫᓂᒃ ᕿᒥᕐᕈᖁᑦᓱᒋᑦ ᐊᒻᒪᓗ ᑐᑭᑖᖁᑦᓱᒋᑦ ᒪᓂᑦᔨᕕᐅᒍᑎᒥᓂᒃ.

ᐅᖃᐅᓰᑦ ᐱᓇᓱᒍᓐᓇᐅᑎᖏᑦ ᐃᓄᐃᑦ ᐃᓚᐅᔪᑦ ᑐᑭᑖᕐᑐᐃᔨᓄᑦ ᑌᒪᖕᖓᐅᓂᕐᓴᖅ ᐃᓄᒃᑎᑐᑦ ᐊᒻᒪᓗ ᖃᓪᓗᓈᕐᑎᑐᑦ ᐅᖃᐅᓯᐅᕗᑦ. ᓲᓱᑦᓴᖏᓐᓇᓗᑎᒃ ᐅᖃᐅᓯᕐᒧᑦ ᒪᓕᒐᕐᒥᒃ ᐊᑐᕐᑎᑕᐅᔪᒥᒃ ᑯᐯᒃᑯᑦ ᑲᕙᒪᖓᓄᑦ, ᐅᖃᕐᓯᒪᔪᒥᒃ ᐱᓇᓱᐊᑦᓭᑦ ᐊᓪᓚᖏᑦᑕ ᓄᐃᖃᑦᑕᕆᐊᖃᕐᓂᖏᓐᓂᒃ ᐅᐃᒍᐃᑎᑑᕐᓗᑎᒃ, ᑫᓪᓗᐊᑏᑦ ᑐᑭᑖᕐᑐᐃᔨᓄᑦ ᓄᐃᑦᓯᖃᑦᑕᖁᔭᐅᕗᑦ ᓱᓇᒥᑦᓯᐊᑐᓂᒃ ᐅᖃᕕᒎᓕᕐᑎᓯᒍᑎᓂᒃ ᐊᓪᓚᓯᒪᔫᑎᓪᓗᒋᑦ ᓄᐃᓯᒪᔭᒥᓐᓂᒃ ᐅᕝᕙᓘᓐᓃᑦ ᐅᖃᕆᐊᑭᓪᓕᑎᔪᓂᐅᓐᓃᑦ ᖃᓪᓗᓈᕐᑎᑑᕐᑎᓗᒋᑦ ᑕᒪᓐᓇ ᓱᑲᓐᓂᓴᐅᑎᑦᓯᓂᐊᕐᒪᑦ ᕿᒥᕐᕈᓂᐅᑉ ᑐᑭᑖᕐᓂᐅᓗ ᐱᕐᕈᓯᖓᓂᒃ. ᑌᒣᖕᖏᑐᐊᕐᐸᑦ, ᑐᑭᑖᕐᑐᐃᔩᑦ ᓄᐃᑦᓯᒋᐊᖃᓚᖓᔪᑦ ᓇᒻᒥᓂᖅ ᐅᖃᕕᒎᓕᕐᑎᓯᒍᑎᒥᓂᒃ ᑕᒪ8ᓇᓗ ᓱᕐᕃᖏᓐᓂᐅᔭᕋᓂ ᕿᒥᕐᕈᓂᐅᑉ ᐊᑯᓂᕆᓂᖓᓂᒃ.